政壇：何君堯叫聽眾Add袁國強
盛傳大律師公會前主席袁國強將出任下屆律政司司長，曾經同袁一齊參與交通諮詢委員會工作嘅律師會會長何君堯，尋日出席電台節目時就被主持人要求講吓袁嘅為人，點知佢竟然叫人用社交網站facebook（fb）。莫非佢想叫大家透過fb同袁做朋友，加深對袁嘅了解？
經主持人再三追問下，佢終於講多幾句，話袁有新一代新青年代表性嘅一種性格，就係不斷求上進，每日做好啲，但永遠唔會認為自己做到最好，因為每日都喺學習當中，會經一事長一智喎。跟住佢仲大讚袁適應力好強，係年輕有為嘅先進，可樹立好榜樣。
被稱為「法律界公職王」嘅資深大律師翟紹唐尋日亦話，同袁國強係二十年好朋友，相信袁可以捍衞香港核心價值，包括法治同一國兩制，如果袁真係做司長，佢會衷心祝賀喎！