SUN微博：打橫嚟講：唔怕生仔無XX

嘩！勁呀！香港候任特首梁振英先生未正式就任，便眾目睽睽下，公開露一手，速戰速決的，為本地解決了整個曾蔭權低能班子無法梳理的深層次困局—雙非孕婦來港生仔問題。

大陸雙非孕婦冒死湧港產子，衝擊香港法制不特止，還帶來此處永久性後遺症，不論醫療、教育、福利或民生，已不再是經濟的單一事件，更搞寸埋中港兩地文化、群族、法律，甚至係政治問題。連普通小市民都知要及早解決啲大鑊嘢，日日夜夜致電電台烽煙節目討論、投稿報章發表意見、飲茶搭枱都講餐飽時，仲未計本地大肚婆上街遊行抗議，那個全城公敵的煲呔特首，居然可以充耳不聞，當無事發生，視民意如浮雲。

老董是「議而不決，決而不行」的表表者；煲呔曾更是「不議不決」，七年唔做嘢的能手，所以，回歸十五年來，香港逐被落後的內地鄉鎮追趕超前囉！嗱！今鋪，振英哥來了！唔玩三叫「狼來了」嘞！一嚟就手起刀落，畀你班港人見識吓乜嘢叫做「強政勵治」。

當建制派聲聲高叫「大和解、大和解」，振英哥就話你知，何謂「大和解」；現連泛民敵對派皆鼓掌支持「零配額」、周一嶽亦反口力挺未來特首無架空今屆政府，最正就係振英哥是得到功能組別醫療界多位選委投票支持當選的，故咁先係名副其實的「大和解」也！

振英哥未上班，就讓全港市民晚晚安心做愛做嘅事，唔怕生仔無××—床位，真勁。

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

就係敢爆：盛女唔怕做？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot