SUN微博：「食唔起敗家樂係無能」

本港龍頭連鎖快餐店近日推出一款燒鵝飯竟標價五十大元，震驚飲食界，令一眾食客望住餐牌Ｏ晒嘴，唸唸有詞問候人娘親，未食飽先鬧餐飽。

本報接獲潮童投訴：

我叫左去買個一哥 咁d飯有d燒鵝 就$50蚊

條友問我要唔要加飲野黎飲 我唔洗講啦 就話飲唔起 點知佢話飲唔起係你無能

我都唔知佢up咩斑鳩 跟住我話唔要野飲 佢話100蚊 :o) 我話唔要 跟住佢話我係咪睇開亞視

尋佢滷味敗家樂:o) :o)

快餐霸權大聯盟主席兼敗家樂主席陳乳乾表示，敗家樂要走扮高檔路線，因此大幅提高食物價格，以營造高級餐廳很Hi的感覺。「以燒鵝嘅價錢，蔗渣嘅味道都可以做到其門如市，呢啲就係做生意嘅最高境界。」陳乳乾還保證，除了價錢上調外，食物的質素及分量不會隨之而提高。

「你哋仲有得揀咩」

被問及敗家樂多次加價無顧及企業良心時，陳乳乾激動地邊噴口水花邊說：「我哋個餐已經皇恩浩蕩送埋咖啡/茶/汽水，以防食客口乾骾死，非常照顧周到，點可以話我哋無良心呢？」陳乳乾說罷以手抹一抹嘴邊的口水，冷笑一聲續道：「嘿，就算我哋加到一百蚊個飯，咪一樣有人食，敗家樂喺全港大小商場屋邨插旗開檔，逼死晒啲餐廳仔，你哋仲有得揀咩？！」陳最後還補上一句：「學中出地產老闆屍永青先生話齋『市民買唔起樓，係佢哋無能！』我敢講，市民食唔起敗家樂，係佢哋無能！」

網民鬧爆敗家樂：

小喇叭：轉食素算9數啦！

大　師：食肆用燒鴨扮燒鵝是常識吧。

洪七公：叫咗你班香港人咪X幫襯，仲要叫你朋友家人都咪X幫襯，唔好貪方便去助長佢壟斷個市場，受害嘅一定係你自己。