政壇：政商定格：肥亨呂志和做高球「拍乸」
中策集團前主席馬時亨自從轉做中策高級顧問後，陪家人同朋友嘅時間都多咗。早幾日行經中環某酒店，就見到肥亨同嘉華國際主席呂志和歎茶，期間仲雞啄唔斷添！佢哋傾咗一個鐘頭至埋單離開，但繼續邊行邊傾，講極都唔完。唔通肥亨想過檔幫呂志和打工？
記者上前同佢哋打招呼，問肥亨係咪想跳槽？佢笑笑口話：「和哥公司大把猛將，使乜搵我去做吖！」咁會唔會幫下屆特首梁振英呢？佢話肯定唔會，而身邊嘅呂志和插嘴話：「千祈唔好呀，佢入番政府，邊個陪我打波（高爾夫球）呀？」肥亨話依家仲好忙，經常飛來飛去開會，有時間都留番畀自己休息吓。
呂志和（左）同肥亨（右）輕鬆歎茶密斟一粒鐘。
二人落樓梯時，肥亨（左）細心攙扶呂志和一把。