政壇：搞搞政：公記唔撐選新東 大輝再輸梁營

特首選舉後一直避見CY梁振英嘅唐唐「家臣」林大輝，尋日終於同其他四位立法會「散人」搵CY會面，會後坦言建制派喺選舉後存有矛盾係事實，佢亦的確有擔心過秋後算帳呢個問題，但相信最後唔會發生喎！

大輝又話，如果真係有人搵佢算帳，「我相信我會有最大嘅智慧、最大嘅勇氣去面對同應對！」點解講到咁悲情？好似仲傷心過當日唐唐落選噃，可能係同佢密謀上演「家臣復仇記」失敗有關。

據聞上屆循廠商會功能組別出選嘅大輝，早幾日向「有票冇人兼冇財」嘅沙田地區政團公民力量（公記）招手，希望公記支持佢參選新界東直選，仲承諾會「帶錢入黨」，擺明係想借轉戰直選為唐營挽回聲勢。之不過，公記一早已同挺梁嘅沙田區議員龐愛蘭「結緣」，前晚仲正式通過龐愛蘭加入代表佢哋參選新界東添！即係唔騷大輝，令唐營再輸多鋪畀梁營。