政壇：金勞詹連環爆粗主席放生

按照立法會議事規則，粗言穢語係唔可以亂講嘅。不過，金融服務界議員「金勞詹」詹培忠，尋日喺立法會講講吓「長毛」梁國雄被罷免議員資格動議時，無端端將矛頭指向公文袋，話佢哋維護長毛係私利，仲突然爆粗話：「公民黨選舉實輸到×街！」加上佢先後疑似爆粗咗幾次，完全視議事規則如無物。

最奇怪係立法會主席曾鈺成尋日好鬆手，只係要求金勞詹收回有關說話，但金勞詹唔知做乜，竟然好躁火咁回敬一句：「驚咩呀！唔講都講咗啦！」最離譜嘅係主席又由得佢，冇按議事規則趕佢出會議廳，完全當冇事發生，相比過往對待泛民議員，確係厚此薄彼。

其實尋日金勞詹爆粗唔止一次，全程講嘢都扯晒火，疑似爆粗咗幾次，有次佢無啦啦指住李卓人鬧，話「唔畀講嘢拍枱呀！」又話：「唔鍾意就行出去一齊打鳩（交）囉！」行為極之無禮。唔知佢係近期熱氣躁火得滯吖，定係去賭場賭輸咗錢呢？抑或係因為佢支持嘅唐唐做唔到特首呢？不過，奉勸佢一句，咁扯火對身體冇益o架！