政壇：工聯會為參選會員洗底
新一屆工聯會領導層尋日特登搞咗個茶敍，升呢做榮譽會長嘅鄭耀棠又有新猷，佢話有見特首選舉互相抹黑得太勁，為免被黑材料拖累，會為參加立法會選舉嘅工聯會參選人搞「洗白白」課程喎！
所謂「洗白白」課程，簡而言之就係教班參選人點樣避免缺失，如果參選人真係有問題嘅話，唔該盡快合法去解決，解決唔到就唔好出選，以免拖累同僚選情。工聯會以「風車陣」參選九月嘅立法會選舉，全港五區同超級區議會都會派人，唔通係怕被建制派嘅自己友抹黑，所以做定嘢先？
同樣榮升榮譽會長嘅「票后」陳婉嫻話稍後約候任特首ＣＹ梁振英會面，傾吓社會流動性議題，佢呼籲CY一定要交代標準工時立法進程，否則唔使旨意連任喎！
鄭耀棠（左）為工聯會參選人搞「洗白白」課程，免被黑材料拖累。