政壇：周一鑊傷膝不如早抖

候任特首CY梁振英日前果斷截停明年私家醫院雙非孕婦分娩配額，一直剛愎自用、後知後覺嘅食物及衞生局局長周一嶽隨即「跪低」，暫停同私院商討明年雙非配額。周一鑊一直只顧雙非孕婦，而漠視本地同單非孕婦，如今CY一出聲話要截龍，佢就立即配合，尋日仲以自己「膝頭做過手術」為理由，拒認「跪低」，認真無恥。如果膝頭真係有事，不如以腳痛理由早啲落台好過啦！

自詡「零配額」有功

周一鑊尋日喺電台節目上認叻話，兩個禮拜前已主動同CY討論雙非孕婦配額問題，又透露同私院商討時，已表明下屆政府有自己做法，認為私院應該對「零配額」有心理準備，又話早啲公布係好事，可以等私院有時間準備轉型。講到尾都係想讚自己對「零配額」有功啫！

CY競選特首時，早就主打解決雙非孕婦問題，已講咗好多個月，稍為留意吓新聞都知道，但偏偏周一鑊就乜都唔知，上個禮拜仲繼續同私院商討明年雙非配額，傳出明年配額由三萬個減到二萬幾個，如果佢話兩個禮拜前已同CY傾過，咁到底佢有冇用耳仔聽嘢呢？抑或見CY時不停諗住自己有冇得留任呢？

周一鑊做錯嘢唔係新鮮事，每次出事後都堅持「死不認錯，永不改過」，佢喺雙非問題上明明衰咗，但尋日仍然死撐話唔係因為CY嘅決定而「跪低」，仲扮晒幽默咁話「自己膝頭哥做過手術，唔係咁容易跪低」，當局一定會執行「零配額」嘅決定。立場幾日內大轉變，呢啲唔係跪低，又係乜呢？唔通佢想人哋讚佢「從善如流」或「成功爭取零雙非」？

夕陽政府早就hea住等收工，庸碌無能嘅局長就算依家走人，其實都唔會影響日常運作，既然周一鑊話自己膝頭有事唔可以跪低，倒不如以腳痛理由提早落台，一來避免繼續浪費納稅人金錢，二來總好過換屆時被人叮走吖！