雙非衝閘又急增 跛腳政府扮鴕鳥

雙非孕婦大軍壓境，跛腳鴨政府虛應故事，明堵暗拖，噩夢揮之不去。

港府農曆年前煞有介事推出四招所謂行政措施，食衞局局長周一嶽仲拍晒心口話，呢啲措施可有效堵截雙非孕婦，講到好似靈丹妙藥咁巴閉。可惜講者自講，事實係點，數字最有說服力，冇花冇假，一目了然。

呢，醫管局數字顯示，上個月雙非孕婦臨盆一刻至去公立醫院「衝閘」分娩嘅個案，比二月份增加一成三；同舊年同期比，升幅更接近九成，問你驚未。事實證明所謂行政措施根本冇料到，當局仲死撐話，數字雖然比舊年同期多約一倍，但已經少過高峰期，反映打擊措施有成效喎。

叮！唔好再自欺欺人嘞。不如睇吓另一個數字吖，今年首季喺公院分娩嘅非本地孕婦入面，衝閘入院嘅超過三分之一；而舊年全年衝急症室嘅人數，只佔非本地孕婦入院總數一成半。

雙非孕婦衝急症室數字，稍微回落後好快又掉頭反彈，佔非本地孕婦入院總數比例更急升逾倍添。好明顯，當局吹到天花龍鳳嘅行政措施，根本就係濕水炮仗。有婦產科醫生指港府嘅招數難以杜絕雙非孕婦闖關，可謂一語中的。

雙非問題千頭萬緒，如何解決，社會意見分歧，其實講來講去，問題源於終審法院當年對「莊豐源案」嘅判決，容許雙非孕婦在港所生子女有居港權。所以咯喎，只要釜底抽薪，從法律層面消除呢個導致雙非孕婦湧港產子嘅誘因，問題先至可以迎刃而解。否則，無論港府採取乜嘢行政手段同堵截措施，都只係螳臂當車，徒勞無功。

講開又講，今年兩會期間，多名港區人大代表聯署，就雙非子女居港權問題要求人大常委會研究包括釋法在內嘅各種辦法。點知港府擇惡固執，話行政措施已行之有效，毋須釋法喎，簡直九唔搭八。

明明有治本良策，偏偏要飲鴆止渴，唔通夕陽政府腳跛兼腦殘？計太一叮話齋，煲呔曾根本就係諗縮數，現屆政府來日無多，佢同富豪勾勾搭搭，為自己安排後路忙到抽筋，雙非問題呢個政治炸彈，梗係拖得就拖，拖到夠鐘，咪留畀下屆政府拆咯，叮！