政壇：政商定格：梁紹莊山東美食宴老友

喺CY梁振英當選特首後，佢嘅山東老鄉莫不欣喜若狂，就連CY經常幫襯嘅灣仔美利堅京菜館都人氣急升，原來菜館創辦人叢樹倫同CY一樣都係山東威海人。同樣係威海人嘅山東商會前副會長Tommy梁紹莊日前約埋朋友去嗰度開餐，見佢不停同朋友打招呼，好似返咗屋企咁熟絡。

Tommy叫咗包括韓國泡菜嘅始祖「威海泡菜」、多汁鮮味嘅三鮮水餃同彈牙爽口嘅炸醬麵，雖然唔係貴價嘅山珍海錯，但勝在食材新鮮惹味。

佢話好多山東人喺香港嘅交情經歷幾代，關係密切，好似佢媽媽都姓叢，係菜館老闆叢家嘅親戚，依家菜館已由創辦人叢樹倫嘅囡囡Josephine打理，專心做好京菜同魯菜（山東菜）。

好多人對菜館名字美利堅（American）感到好奇，Josephine就話六十幾年前，佢爸爸頂下菜館時已叫此名，沿用至今，但菜式就由西式轉為中式。