政壇：IQ博士信CY唔係黨員

中總嘅立法會代表「IQ博士」黃宜弘一直支持唐唐參選特首，雖然佢最後轉軚支持候任特首CY梁振英，但佢哋嘅關係到底係點就真係冇人知。CY早前被人話佢係政黨成員，IQ博士尋日接受電台錄音訪問時就話，當年CY加入嘅新香港聯盟（新港盟）只係一個政治聯盟，變相幫手澄清CY唔係政黨成員。

IQ博士仲話同CY一向都係朋友，但因為大家嘅嗜好唔同，所以見面時都係傾公事居多，加上CY唔係咁鍾意杯中物，所以每年喺北京兩會期間都從未叫過CY出去飲酒喎！

當時身為《基本法》諮詢委員會副主任嘅羅德丞，喺八九年創立「新香港聯盟」，CY同IQ博士都係成員之一。IQ博士重提舊事，話新港盟當年向中央政府提出分組點票，其他成員全部都贊成。最後新港盟喺九一年派出四人參選立法局，最後只係得IQ博士喺冇對手下自動當選。