政壇：唐唐「家臣」大輝何去何從

特首選舉結束後，唐唐離開香港呢個傷心地，遠赴美國探女，而被指係唐唐「家臣」嘅立法會廠商會代表林大輝亦趁住之前幾日清明節假期去咗新加坡散心，聲言要好好思考吓自己嘅未來。大輝尋日同傳媒聚會時話去到獅城，除咗可以着短袖衫、短褲，朝朝瞓到十點鐘先起身外，仲可以遠離所有有關特首選舉嘅新聞，仲自爆期間亦有同唐唐聯絡，但聲稱大家只係傾閒偈，並冇商討前路何去何從喎！

大輝話不時都會反思，當然愈接近立法會改選，反思自然愈多、愈密，反思嘅結果係，佢覺得自己嘅性格唔係好適合從政，又話除從政以外仲有好多方法服務社會喎。咁仲會唔會參選下屆立會呢？佢就冇一口拒絕。即使佢肯選，早就有風聲話廠商會嫌佢嘅「家臣」味道太濃，所以挺梁嘅前立會廠商會代表呂明華、前會長尹德勝都對大輝嘅議席虎視眈眈。

廠商會終歸係唐唐嘅老巢，自己友嘅話，除挺唐嘅現任會長施榮懷有可能出選外，莫非真係如傳聞所言，個議席會留番畀唐唐延續餘下嘅政治生涯？

無論如何，尋日大輝言談間確實帶點黯然、落寞，同以前嘅神采飛揚、口若懸河有好大分別。究竟唐營前路何去何從，大輝就話等唐唐月尾返港後，試吓拉埋唐唐一齊見吓大家喎！