政壇：李鋈麟「食物保鏢」傍身
東華三院總理李鋈麟嘅生意遍布內地各省市，話說四年前佢喺內地一個宴會上飲到半醉，飲咗疑似假白酒都唔知，翌日起床時竟然吐血，搞到瞓咗十幾日醫院。自此之後，佢就靈機一觸，帶個本身做廚師嘅「食物保鏢」一齊出門，去到邊跟到邊，試過晒所有食物同飲品冇異樣，佢至放心品嘗。咦！咁咪好似古代皇帝進食前要用銀針為食物驗毒一樣。
李鋈麟話內地食物質素真係麻麻，試過食到塑膠雞蛋同變味食物，就算幾高級嘅酒店餐廳都係咁，佢建議經常去內地工作嘅朋友，不妨考慮請番個「食物保鏢」，到時就算飲到醉醉哋，都唔怕飲到假酒啦！
