政壇：阿人要CY硬啃

趁住尋日係復活節假期，職工盟遊行去候任特首辦，要求候任特首CY梁振英上任後將勞工假同公眾假睇齊，由依家嘅十二日增加至十七日，仲話特首候選人唐唐嘅政綱承諾過畀打工仔十七日勞工假，如果因為CY贏咗場選舉，搞到打工仔冇咗五日假，就係天大嘅諷刺咁話。CY嘅政綱本來就冇承諾過推行十七日勞工假，職工盟夾硬要CY孭埋唐唐留低嘅期票，其實唔係幾公道，再講淨係CY自己嘅政綱要落實晒都有排啦，要推十七日勞工假真係唔知等到幾時。

執工聯會口水尾

其實工聯會前兩日先要求政府將勞工假同公眾假期睇齊，又向CY反映意見，工聯會立法會議員黃國健仲話，佢哋早喺星期一已經應邀去咗候任辦同CY會面。所以職工盟尋日遊行去候任辦話要爭取十七日勞工假都只係執工聯會口水尾。

不過，最莫名其妙嘅係，職工盟李卓人仲話唐唐有喺政綱提推行十七日勞工假，依家CY贏咗選舉，搞到打工仔冇咗五日假喎。佢仲話已經以佢個人嘅名義向立法會主席提交私人法案，希望可以喺立法會大會討論。

其實李卓人咁講，真係有啲唔係咁公道，首先CY本來就冇呢項政綱，冇理由夾硬要人孭埋對手嘅期票㗎。再講，如果佢係咁支持唐唐嘅政綱嘅話，點解特首選舉投票當日有票在手嘅佢又唔去投票畀唐唐呀？依家咁做即係夾硬要「涼粉加糖」。咁又算唔算輸打贏要呢？

工聯會會長鄭耀棠就唔同嘞，一早就歸邊支持CY，依家工聯會獲邀見CY之餘，棠哥尋日仲率領屬下專業團體一百六十幾人，浩浩蕩蕩上埋京添。今次職工盟真係畀工聯會搶晒風頭喇！