SUN微博：打橫嚟講：認住呢隻鷹

特首選舉當日，警方沒有發出口頭警告便向示威者兜口兜面施放胡椒噴霧，事後，警務處處長曾偉雄高度讚許手下行動果斷，話「如能先警告便會先警告」，暗喻「唔先警告咪唔警告囉」，並揚言，若唔滿意警方咁做嘅話，歡迎大可提出投訴喎！真係寸到無倫！

這不是寸，而係反智兼乞人憎，攪亂香港。中國政府推行緊全國和諧政策，你隻禿鷹卻在公然宣揚暴力鎮壓，持惡行兇，不特止視法紀如無物，仲衰過街邊蠱惑仔。兩幫開拖前都懂得叫囂預警：「你望乜×嘢，再眼超超，信唔信我打鑊你？」

家陣，警權過大到好得人驚，報載梁振英當選特首後，本想落區向市民謝票，卻遭警方阻撓，理由係怕佢民望低，走去人多地方，會出現秩序問題。唉！唔使做咩？不如困阿林公公入赤柱先啦！千萬咪畀佢見人呀！佢民望咁低。查實，禿鷹如非寸緊或害緊振英哥，就係弄權同施下馬威！

香港人點解咁反對二十三條立法呢？其中就係怕畀一些驗身唔驗腦嘅低智腦殘，橫蠻無道、有法不依的「執法者」去執法。我必須講清楚，香港警務人員中有很多精英，我也識唔少，只可惜就總係畀一粒老鼠屎整「喎」成煲粥嘅！

梁特首組新班子時，話明唔要民望低嘅垃圾，咁就請認住呢隻鷹嘞！

歡迎add我facebook一齊鬧爆夕陽政府

彭志銘

次文化考古學家，對城中潮語有深入研究，博徵博引，廢官廢人行埋一邊。