政壇：大舊倡設反貪腐基金

東方報業集團早前揭露煲呔曾貪盡富豪提供海陸空款待，惹起全城公憤。立法會議員「大舊」陳偉業尋日喺立法會上繼續大罵煲呔曾嘅行為卑鄙無恥，又盛讚《太陽報》及《東方日報》嘅報道畀市民認清煲呔曾嘅真面目。大舊仲喺財政預算案辯論中提出修正案，建議將削減特首辦嘅開支捐畀東方報業集團成立反貪腐基金，監察政府仲有無其他官員接受款待喎。

《東方》已有兩基金助市民

不過，揭露真相係本報嘅天職同責任，加上本集團有兩個盈餘充足嘅「太陽報愛心基金」同「東方日報慈善基金」一直幫助有需要嘅市民，所以都係婉拒大舊嘅好意喇。大舊提出修正案嘅原因，係佢認為如果繼續向特首辦撥款，等於縱容貪腐行為，於是提出將特首辦同行政會議嘅全年預算開支削減至剩番一千元，但有關修正案最後被否決。

對於大舊嘅批評同建議，政制及內地事務局局長譚志源就回應話，特首辦職責眾多，包括籌備公務同社交活動，又要統籌政府新聞資訊，強行削減特首辦開支等於叫特首辦乜都唔使做喎。其實大舊又唔可以一竹篙打晒一船人嘅，事關貪盡海陸空嘅只係煲呔曾夫婦，唔應該禍及其他人。