政壇：馮驊寸小圈子選舉？

上屆特首選舉得八百選委投票，今屆雖然人數多咗，有成千二選委有得投票，但外界仍狠批係小圈子選舉，政府就一直唔肯承認。不過，選管會主席馮驊尋日講講吓講漏嘴，話今屆特首選舉投訴較上屆多，主因係今屆「有競爭」，即係暗示以往冇競爭啦，真係寸到應一應。

馮驊尋日同記者簡介立法會選舉指引初稿時，畀記者圍攻追問特首選舉一事，佢自爆今屆選舉投訴有成八十宗，比起上屆特首選舉嘅三十宗，多出一倍有多，投訴主要涉及拉票行為、發表虛假陳述同聲明等；若發現有初步證據違反選舉條例，會將個案轉交廉政公署，但現階段唔會評論個別投訴。

既然多咗咁多投訴，記者當然追問點解啦。點知一係唔講，一講就出事，佢話由於社會發展上有進程，加上今次特首選舉「有競爭」，所以投訴數字先會上升。

當袋巾傑冇到

今屆有三個人出嚟選，包括唐唐、CY同白鴿黨嘅鐵頭仁，而上屆都有公文袋嘅袋巾傑同煲呔曾落場選，以馮驊咁講，嘩！咁佢咪即係當袋巾傑冇到？

聽到佢爆大鑊，在場記者即刻打個突，有人仲反問佢，係咪暗示緊以往幾屆特首選舉，都係冇競爭先？可能佢都知道自己講多咗，不但面色即刻一沉，而且唔肯再講多次係咪「有競爭」，只係話今屆選舉都好激烈，至於係咪有競爭，大家自有判斷喎！

當問及中聯辦被指嚴重干預今屆特首選舉，馮驊強調：「任何人都有權拉票，無理由畀呢個拉，唔畀嗰個拉。」「我唔能夠根據你哋講嘅一啲傳聞，就去調查，咁會畀人話唔公平，點解唔去調查其他案例。」