荷葉飯藏斷匙羹 美心靠害戥穿石

九龍灣德福廣場美心皇宮酒樓，昨午奉客的鮑汁荷葉飯，竟然包藏兩吋長斷匙羹柄，一名參加婚禮的戥穿石險咬爆嘴，部長收到投訴後圖搶走證物，新任外父三催四請食環署到場，但食環署懶懶閒和姍姍來遲，又聽從酒樓指示不敢取走蒸籠證物，激發事主滿腔怒火，將美心職員和食環署「一鋪過」鬧到頭耷耷。他怒轟食環署卸責、官僚作風，輕視小市民及偏幫大集團：「香港點解會失敗？依家咁嘅制度，邊仲有公理，我哋納稅人啲錢使咗去邊呀？」

單挑食環署和美心酒樓的老翁姚先生（六十餘歲），昨日他主持完女兒婚禮後，下午一時許請三十多名親友到德福廣場美心皇宮酒樓午膳。期間姓黎（四十三歲）的戥穿石進食鮑汁荷葉飯時，竟然咬到一條近兩吋長的匙羹斷柄，險些爆嘴，姚即向女部長投訴，但被人一手搶走斷柄。

廚師囂張笑住行開

新任外父姚先生激氣稱：「女部長想搶走碗仔同匙羹柄，畀我阻止後，就話攞入廚房畀個廚師睇，需唔需要呀，起碼關注吓個顧客有冇受傷，佢根本想搶走啲證物，呢啲食肆係咁樣做法。」姚又指：「個廚師出來，睇一睇啲飯，笑一笑走咗，態度咁囂張，令我好反感。」

姚三次致電食環署熱線投訴，他指食環署多次回覆稱要花時間找衞生督察，經一拖再拖，姚怒火升溫，着姓黎受害人致電報警及召記者到場。四十五分鐘後，一名女衞生督察到場，要求姚填寫資料，並將證物逐一放入證物袋，但取走蒸籠時被阻止，姚即要求完整取證，但女督察駁嘴：「呢啲係人哋嘅財產。」姚遂痛斥：「咩叫證據啊？我哋嘅人命係假嘅！」「人哋大集團話蒸籠唔攞就唔攞，咁死咗人點呀？」

他指住女督察斥道：「接到投訴竟然話睇吓有冇『幫辦』得閒，三番四次咁推搪，唔通全香港得一個幫辦，咁我哋納稅人啲錢使咗去邊呀？」姚愈講愈激氣：「嚟到啦，又話要填呢種form，填嗰種form，喂，到時你哋要上庭，即係望你哋嫌麻煩，唔好上庭，唔使做，你食環署咁辦事，作為一個市民，好似香港依家真係投訴無門。」在場的酒樓和食環署職員，面對姚翁的訓斥，均無言以對，姚繼斥道：「依家香港咁嘅制度，邊有公理，涉及人命危險嘢，你（食環署）偏幫大集團呀，我幾唔得閒都上嚟落口供同上庭。」

最後食環署女督察「頭耷耷」將蒸籠、碗仔、荷葉飯及匙羹柄一齊取走。姚先生昨晚在九龍灣參加女兒婚宴仍未消氣：「唔好以為客人一定為攞着數才投訴，以為幫我畀咗一千零二十八元就算數。」他稱，雖然有分區經理到場了解，廚師也已道歉，但他認為仍要追究。美心集團發言人稱，接獲客人對荷葉飯的意見後，已即時跟進及展開調查，公司亦即時向該店員工重申有關食品之製作指引，並會加強監察。