貪曾厚顏拒落台 香港廉潔勢陪葬

「香港第一貪」曾蔭權多咗兩個傳神花名：「現代和珅」同「香港陳水扁」。天馬行空咁諗，和珅泉下有知可能笑到肚痛：哈哈，連肥雞菜心都唔放過，佩服，佩服呀！

至於阿扁，可能就會憤憤不平：我呸！如果煲呔曾在台灣，早就坐牢了，還有機會上立法院扮哭裝蒜？咳咳……還我保外就醫權！

即係咁，和珅早已人名俱滅，佢會對煲呔曾呢位幼稚園級別嘅貪官後輩有乜睇法，只有天曉得。不過，話阿扁不忿煲呔曾至今逍遙法外，唔係純粹吹水o架，事關台灣政界好多人都深有同感，叮！

嗱，煲呔曾貪腐醜聞轟動全港，震驚國際，大家尋日已經聽過海外港人點樣不齒佢嘅所作所為，今日不如換個角度，睇吓各地學者、政客點樣聲討貪曾啦！

貪曾醜聞愈揭愈臭，台灣立委陳學聖就話嘞，事件如果發生喺台灣，就算廉政單位唔主動查辦，民間力量同傳媒早就要求煲呔曾落台。台北市議員林瑞圖亦批評，煲呔曾嘅行為屬集團性貪腐，同陳水扁不相上下。

台灣法律界人士更加指出，煲呔曾單係廉租深圳超豪行宮，已經涉及利用職務獲取不正當利益嘅刑法責任，喺台灣可被判處十年以上有期徒刑。香港廉政公署聽到未呀?煲呔曾如果唔被繩之以法，實冇天理呀！

寶島之上批曾之聲四起，西方國家又點呢？梗係一樣炮聲隆隆啦。倫敦紅橋區市議員陳德樑促請廉署徹查貪曾醜聞。美國聯邦眾議員艾蘇提醒港府肅貪。悉尼寶活市副市長王國忠更指，澳高官涉貪落台嘅例子比比皆是，好似前新省基礎工業廳長因接受發展商性賄賂而引咎辭職，就係例子。

嗱嗱嗱，各地炮轟聲中貫穿一條清晰脈絡，就係如果煲呔曾身處成熟民主社會，早就腳痛落台，甚至鋃鐺入獄。煲呔曾家陣厚顏賴死唔走，唔止自己身敗名裂，遺臭萬年，香港嘅廉潔聲譽亦隨時陪葬，一鋪清袋！

係喎，有人話，香港嘅「一國兩制」可以垂範台灣，家陣「台灣之子」陳水扁因貪污入獄，如果「香港之恥」煲呔曾居然最終逍遙法外，唔使腳痛落台，又唔使坐監，咁香港示範台灣嘅咪係包庇貪腐！

咁啦，太一叮不妨再天馬行空多一次，希望煲呔曾為香港着想，主動補鑊贖罪，一係自動提早退伍，一係主動投案向廉署自首，兩樣畀你任擇其一又點話。叮！