政壇：政商定格：-30℃做背包客鍾少權凍入骨
星展香港董事總經理兼豐盛理財及分行網絡業務主管Derek鍾少權話，今年一月去咗莫斯科同聖彼得堡，嗰時係零下二十六至三十度。
佢話今次係一個人揹住背囊去旅行，十足十年輕人好興嘅backpacker（背包客）咁，亦冇book酒店，揀咗住hostel（旅舍），而且喺咁凍嘅天氣，仲徒步去各個景點。佢話喺莫斯科搭地鐵多，但喺聖彼得堡時就只搭咗一程地鐵，其他景點都係徒步行過去。零下幾十度仲要做背包客，佢似冒險多過去旅行，但佢就話條街好好行，點解？因為太凍冇乜人出街！
佢仲揹埋部單鏡反光機去影相，點知一拎部相機出嚟部機就凍到「蕉」咗，惟有除手套用iPhone影，佢話嗰下凍到入骨，真係記憶猶新。
鍾少權形容去莫斯科旅行，凍到入骨。（資料圖片）