政壇：政商定格：純官女婿「菠蘿蜜瓜鯉魚」求愛

新世界發展主席鄭家純愛女Sonia鄭志雯出嫁，前晚喺女家地頭嘅會展舉行婚宴。外父純官好幽默，喜宴上致辭時，講明全晚酒席同紅酒通通由新郎哥Paulo龐建貽埋單，畀足面男家。

佢直言好驚囡囡婚後炒佢魷魚，投身家庭主婦行列，遂提議囡囡放五年假，生夠七個小朋友之後，隨時返公司幫手。跟住又爆囡囡鍾意Shopping，一次過買十幾對鞋，希望新郎哥多多包容，認真風趣。新外父又不忘傳授夫妻相處之道，話嘮叨係女人天性，男人聽見太太「哦哦」，一定要忍喎。

Paulo喺婚宴上大爆求愛經過，話說兩人首個情人節，佢突然送上生果籃，內有菠蘿、蜜瓜及一條鯉魚，Sonia諗極都唔明意思，後經友人解畫，才知「菠蘿」諧音係「Paulo」，即是龐的洋名；「蜜瓜」與「掛」是諧音，「鯉魚」就代表「你」，加埋就係:「Paulo掛住你。」求婚當日，Paulo亦盡顯情聖本色，花兩年時間先搵到一粒完美無瑕嘅鵝蛋形鑽石，然後約Sonia上山頂求婚，十足童話故事。