政壇：搞搞政：唔妥鐵頭仁公文袋投白票

白鴿黨「鐵頭仁」何俊仁話就話代表泛民主派出戰特首選舉，但泛民內部又傳出爆發內訌。據聞公文袋唔想見到鐵頭仁喺今次特首選舉嘅得票，有望高過公文袋黨魁「袋巾傑」梁家傑喺上屆特首選舉攞到嘅一百二十三票，認為咁即係變相幫咗白鴿黨喺九月立法會選舉嘅表現，因此聯同其他激進民主派呼籲全體泛民選委喺「3．25」特首選舉投白票。

有白鴿黨中人話佢哋對工黨等激進泛民選委，基於反對小圈子選舉原則而投白票冇乜意見，但對公文袋都咁做就好火滾，因為當年袋巾傑參選，白鴿黨選委最後全部都投番畀佢，依家換咗佢哋主席參選，公文袋就忽然話要玩杯葛投白票，擺明係對人唔對事，亦等同唔尊重泛民特首初選嘅結果。

白鴿黨強調唔少泛民選委參選時都公開承諾過，會提名同投票支持勝出泛民初選嘅特首候選人，如果佢哋想「轉軚」改投白票，應當重新諮詢相關界別選民嘅意見。