政壇：麥靖宇鬼祟現身中聯辦

尋日下晝三點，特首辦常任秘書長麥靖宇坐政府座駕AM200去咗西環中聯辦，部車一到中聯辦就直駛入停車場，車速都幾快，好似驚畀人見到咁。佢喺中聯辦逗留咗差唔多半個鐘就離開，走嗰陣一樣係全程喺車上。最詭異嘅係，佢見到記者影相，竟然特登擰轉面，都唔知有乜嘢唔見得人。

特首辦回應話，特首辦公室職員不時都會同中聯辦人員進行工作會面同會議，麥靖宇去中聯辦都係一般工作會面喎。原來係咁，如果係一般工作會面，麥常秘下次出入中聯辦就可以「一般」啲，如果鬼鬼祟祟，令人聯想起入去係做一啲非一般嘅嘢，咁就唔好喇。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

麥靖宇尋日鬼祟到訪中聯辦，好似驚畀人見到。