政壇：議員鬧爆唐唐蘇州屎
之前講過，家庭議會針對青少年吸毒、賣淫、疏忽照顧兒童同長者問題做嘅研究報告都係啲「阿媽係女人」嘅結論，議會之前由前政務司司長唐唐做領導，而佢留低嘅蘇州屎就繼續畀人鬧。唔少議員尋日喺立法會圍攻由議會遞交嘅所謂研究報告，話「唐英年照顧自己家庭都唔掂，因為佢坐喺個議會度，先會搞埋啲咁嘅嘢出嚟呃神騙鬼」。
黃成智話個研究結果只係講番過去十幾年社工一直做緊嘅嘢，議會竟然好似有新發現咁，仲明寸話因為唐唐做領導先搞成咁。
李卓人就形容研究結果「唔係炒冷飯、炒熱飯，係揚州炒飯，將政府做嘅嘢炒埋一碟，都唔知有咩新嘢」，佢仲恥笑當中建議商界向家庭提供折扣優惠，只不過係促銷，根本冇解決長工時帶嚟嘅家庭問題。梁耀忠都窒埋一份，指「個研究只係蜻蜓點水，咩都掂啲」。