政壇：貪曾加國搵碇匿

正所謂「自作孽，不可活」。極大想頭要名留青史嘅煲呔曾，點知臨尾香，被《太陽報》同《東方日報》圖文並茂踢爆貪盡海陸空嘅醜聞，喺被質疑「曾商勾結」後，全城鬧爆要「貪曾」下台。煲呔曾見走投無路，早前不情不願咁話會將深圳「禮賓府」退租，而麥當勞道嘅「祖屋」租約又未滿，上星期仲懶可憐咁話七一後住邊都冇着落。言猶在耳，尋日有傳聞話已淪為過街老鼠嘅佢走投無路，身為家中長子惟有諗住投靠遠在加拿大嘅細佬，若然屬實，真係早知今日，何必當初！

尋日有傳聞話，煲呔曾為免同老婆變成露宿者，正打算投靠居於加拿大嘅三弟曾蔭煊同埋五弟曾蔭荃。煲呔曾呢兩位細佬，同曾經做過警務處處長、現任新創建執董嘅二弟曾蔭培，以及現任渣打香港主席嘅細妹曾璟璇唔同，較少香港人認得。有指曾蔭煊同曾蔭荃喺加國創業，專門做煉油設施，要照顧無處容身嘅煲呔曾理應不成問題。

惡名昭彰冇人唔識

其實加拿大咁多香港人，死性不改嘅煲呔曾去到加拿大若然又再行差踏錯，肯定有好多港人睇唔過眼越洋打佢小報告，到時連累埋兩位細佬於心何忍？當然煲呔曾可以返外家，投靠老婆曾鮑笑薇喺澳門嘅家人，但澳門同樣好多港人，所以此路不通。

我哋就有個小建議，依家唔少廣告推介位處太平洋、鄰近澳洲嘅瓦努阿圖，嗰度冇乜嘢可以畀佢貪之餘，至少唔怕連累其他人，佢不妨考慮吓，自己養吓雞、種吓菜，划吓艇仔就當坐豪華遊艇囉。不過，呢個都唔係萬全之策，事關煲呔曾惡名昭彰，去到邊都會有人認得。老實嗰句，佢都係挖個窿匿埋算罷喇！