僭建狡辯縮骨 唐唐誠信缺失

特首參選人唐英年又有金句,就係「做男人要有諗頭,做公職要識縮骨」……弊傢伙,講錯咗,「唐氏語言障礙綜合症」唔通真係會傳染嘅?嗯,NG,再來一次,唐唐嘅最新金句係:「做男人要有膊頭,做公職要有腰骨!」

點解唐唐又爆金句呢?開估之前,太一叮想幫唐唐澄清一件事,佢被人形容係豬,但原來佢有時好鬼有諗頭o架。只可惜,殫精竭慮唔係為國為民,而係偷雞摸狗枉法營私咁解。

件事係咁嘅,唐唐被揭發九龍塘約道7號大宅違規僭建,涉嫌喺大宅泳池之下私建地庫,仲開埋天窗添。暗室藏於碧波之下,格調一流,你話唐唐享受人生幾有諗頭呢!除此之外,大宅天台亦開鑿咗一個玻璃天窗,同樣係屋宇署圖則所無,單憑目測已經斷正。

擅掘地庫有損地基結構,唐唐簡直靠害街坊。再睇番紀錄,唐宅入圖則時為○六年,當時佢係財政司司長,即係知法犯法,簡直罪加一等。更離譜嘅係,上年十月已經有人向傳媒爆料,但佢居然一口否認,幾蠱惑呀!

好嘞,天網恢恢,疏而不漏,違規地庫終於見光死,唐唐焗住死死氣承認確係有僭建。不過,佢仲死撐喎,話名下擁有約道5A同7號兩間屋,前者自住,後者丟空,所以回覆傳媒話屋企冇僭建物。然後甩嘴金句王再拋金句,話有錯就會糾正,因為「做男人要有膊頭,做公職要有腰骨」!

嘩,咁都得!唔怪得唐唐有「感情缺失」囉,根據佢嘅思維,一個好色男拈花惹草三妻四妾都唔算亂搞女人,因為名義上「自住」嗰個先至係伴侶,其他「丟空」嘅可以一律唔認數!所以,唐唐呢套縮骨狡辯,套用番佢自己嘅金句:完全係垃圾!

咦,太一叮忽然諗起唐唐嘅另一金句「所謂僭建論」。上個月唐唐探訪新界鄉紳拉票,居然夠膽死話,新界村屋「所謂嘅違規建築」有自身歷史,呼籲社會以和為貴,互讓互諒。哦,原來唐唐自己都係僭建得益者,咁就難怪對僭建問題咁寬容咯,明白晒!

冇錯,做公職要有腰骨,更加要有誠信。唐唐先有出軌不忠嘅「感情缺失」醜聞,再有知法犯法嘅僭建,被人踢爆仲要縮骨卸膊狡辯抵賴,睇嚟閣下嘅誠信缺失更加嚴重,唔好話做特首,做豬都唔靈呀,叮!

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!