政壇：搞搞政：何鍾泰促停自駕遊
近日大批市民上街反自駕遊，喺群情洶湧嘅反對聲下，政府日前稍為讓步，話港人到內地自駕遊嘅名額唔多，而內地來港自駕遊就仲未有時間表。言猶在耳，尋日就公布試驗計劃嘅詳情。
老實講，粵港兩地嘅交通規例唔同，就連車都分左右軚，如果要趁高興嘅話，就真係要諗清諗楚嘞，連香港人到內地過馬路都有啲心驚，何況佢哋揸車落嚟？好似立法會工程界議員何鍾泰尋日就話，自己就唔會揸車返內地嘞，因為佢曾經見過內地司機開對頭車，簡直係驚險到極，攞條命嚟較飛。
有乜嘢重要過生命？冇！所以何鍾泰話唔單止唔贊成內地人嚟香港揸車，亦反對香港人入內地揸，所以佢根本就係反對成個計劃，仲即刻叫停自駕遊添！
