政壇：小明做特首冇人呱呱叫
「小明」系列唱到街知巷聞嘅李家仁醫生又有新作，最新單曲係《小明做特首》。佢尋日仲畀咗佢嘅手稿我哋睇，故事內容主要係一班人喺度「估領袖」，競猜下屆特首人選，而小明就企出嚟話，如果自己做咗特首之後，包保人人都會哈哈笑，冇人會呱呱叫！
李醫生仲透露，首歌今晚拍埋MV後，預計本星期內就會推出。佢話MV裏面特別多「包」，因為小明唱唱吓中間仲有一段Rap，話「唐唐唔食豬油包、CY唔食沙糖包、權哥唔食黑麵包」。不過，喺首歌最後，就會有旁白出嚟講一句，原來小明喺北京嘅時候，已經被「胡先生」勸退，唔會做特首喇！至於係邊位「胡先生」？李醫生叫大家估吓喎！
李家仁好應景，作咗隻《小明做特首》。