政壇：西九大戲棚鳥獸散

正所謂期望愈大，失望就愈大。特首參選人CY梁振英突被翻舊帳，質疑佢喺十年前嘅西九概念設計比賽漏報利益，各路人物連日揚言追究到底，有啲仲話會喺尋日立法會監察西九小組委員會上跟進。

IQ博士話政府好奇怪

西九項目地又撥咗、錢又批埋、連人事問題都冇，老實講，近期西九小組開會已成票房毒藥，冇乜議員有興趣出席。不過尋日可能就CY單嘢拗餐飽，所以好多議員都一早入場等睇戲，平時見首不見尾嘅霍震霆、經濟動力梁劉柔芬、建仔黃容根、專業會議「大舊石」石禮謙同社福界代表張國柱等，平時唔多嚟開西九小組會議嘅議員捧場不在話下，連唔係小組委員嘅人民力量議員陳偉業、立法會中總代表「IQ博士」黃宜弘都嚟埋，真係賓墟咁嘅場面。

一開波，大舊石同白鴿黨劉慧卿就話要傾CY單嘢，跟住IQ博士仲以偵探口脗話，今次政府喺敏感時刻「擠啲」資料出嚟好奇怪，政府應該公開晒啲資料畀議員討論。不過，小組主席葉國謙搬埋法律顧問上枱，指出小組職權唔包CY單嘢，總之唔好喺小組傾，大舊石同白鴿黨李永達當然唔肯過佢喇，大舊石仲話CY單嘢公眾有知情權、立法會有監察權，應該畀機會相關人士澄清。拗咗近半個鐘，葉國謙都係堅持自己睇法，仲搵埋下台階畀大家話喺內會傾都係一個好嘅安排，大舊石見狀都無晒符，惟有去信內會再跟過。咁反高潮，既然冇戲睇，其他觀眾即刻鳥獸散。