就僭建醜聞唐英年對答全文

記:記者 唐:唐英年

記:報道指九龍塘約道兩單位僭建(大意)?

唐:報紙所載兩項物業係我家族持有,5號(A)係自己用緊,7號係吉嘅,一路冇用過。我自己存在一種誤會,幾個月前有人問我住嗰度有冇地下酒窖,口頭問題,我只係知道住嘅(5A單位)冇,所以答冇,亦叫咗家族有關人士搵合資格專業人士睇,同話如有任何違規建築就盡快採取行動糾正。5號(A)早前專業人士睇過,係幾十年舊屋,有啲違規建築物,違規好耐,花咗一段時間睇番房署好舊嘅契,睇番邊啲係上手業主加喺度。

記:點解(當時答傳媒)話冇(僭建)?係咩僭建物?

唐:我認呢個係我嘅誤會,佢係問有冇地下酒窖,唔係問違規建築同酒窖。

記:(僭建風暴期間)特首叫查僭建,嗰陣冇(向公眾)講係咪特首包庇?

唐:特首唔會幫任何人隱瞞嘅,舊年搵合資格人士睇,我承認做得慢咗,攞啲舊則睇,先知應該有違規建築。舊年搵合資格人士做檢視,特首冇問番我哋有冇違規建築,只係要求我哋搵合資格人士睇,我哋搵咗。

記:幾時發現7號有違規建築?違規酒窖?

唐:7號係一路丟空,我會敦促有關人士將任何違規嘅糾正番。我認為呢就,做男人要有膊頭,做公職就要有腰骨,如果有違規會認,同盡快糾正,做公職人物應有嘅責任,我對做得慢咗表示歉意。

第一手消息請下載on.cc東方互動iPhone/iPad/Android Apps/Windows Phone Apps

搵樓18即睇最新樓價走勢、最全面地產新聞及筍盤情報