「屎渠」通宵罰企忍惡臭

【本報訊】為購得中銀發行的百年紀念鈔,市民付出代價竟然是通宵被困於又臭又濕的後巷內。在中國銀行太子分行外,昨日發現排頭位市民均擠滿於環境惡劣後巷,與渠水及糞便相鄰,陣陣惡臭傳來,排隊者紛紛用紙巾掩面抵擋氣味,不少企通宵的市民均表現得面有難色。狹窄的後巷通道擺滿了雜物及垃圾,加上附近餐館後門直通後巷,更不斷流出污水,有排隊市民形容巷內猶如垃圾崗。

昨日八時許,太子分行逾千名輪購紀念鈔的市民排隊。由於人數眾多,為免阻塞大街通道,中銀故將人龍安排於後巷,人龍愈排愈長,更由後巷一度轉彎至附近西洋菜北街。排隊市民當中不乏內地炒家及南亞籍排隊黨,他們三五成群擠得整條後巷水洩不通。

現場約有十多名警員維持秩序,期間不斷有懷疑「打尖」情況發生,需警員介入調停,但要「打尖」也是要大家一起擠在後巷內迎抗惡臭。該行九點正準時派籌予排隊市民購買紀念鈔,惟不消半小時,職員便張貼出告示指當天的紀念鈔已換購完畢,現場即時噓聲四起,近百市民大呼長時間捱惡臭捱得不值。

第一手消息請下載on.cc東方互動iPhone/iPad/Android Apps/Windows Phone Apps

搵樓18即睇最新樓價走勢、最全面地產新聞及筍盤情報

買家心聲
夏先生(自僱人士):「今朝早七點九先去排隊,兩張單鈔成本三百蚊,依家賣咗一千八百蚊,幾個鐘頭就賺六倍,仲好過等政府派六千蚊!聽日或者再去排過。」

黃先生(設計):「早上冇去排隊買紀念鈔,諗住嚟呢度買張返屋企擺。見佢回收價八百五十元,最多加多一百蚊度,點知開價一千一百元,不能接受!」

「好難頂」
朱小姐(飲食業):「我凌晨十二點開始喺度(中銀太子分行)嘅,喺後巷企通宵等排咗九個鐘,諗住送張紀念鈔畀朋友。不過呢度啲坑渠氣味好臭,好難頂。等到好眼瞓,企咗咁耐陣間唔知點返工!」

李先生(鈔票收藏家):「我覺得呢套紀念鈔有收藏價值。不過無計啦!排隊黨實在太早,點排喎?依家惟有同人用千三蚊即場收購兩套單張紀念鈔。若果炒風繼續蔓延,只會連累我哋真正收藏嘅人。」