議員飛擒大咬 加薪一倍荒謬

立法會有個極之傳神嘅花名，叫「垃圾會」。呢個花名點嚟？睇吓班議員點樣開會咪知囉。不過，立法會或者好快又會多個新綽號：立「發」會。事關下屆邊個當選議員，立即發過豬頭呀！

點解太一叮咁講？嗱，立法會研究議員薪津嘅小組委員會建議，下屆議員嘅薪酬水平同政策局局長嘅一半月薪掛鈎，由現時每月約七萬蚊，暴增至十四萬元。議員飛擒大咬加一倍人工，咁仲唔係發達？唔怪得有人批評，立法會議員係打劫納稅人荷包，同揸刀去搶無分別！

大家可能會話，立法會議員係為民請命嘅崇高公職，唔應該抱住搵飯食嘅打工仔心態，講到人工就兩眼發光。冇錯嘞，議員唔係普通打工仔，點可以同局長薪酬掛鈎呢？再講，今時今日，試問邊有打工仔夠膽死要求加一倍人工o架？唔怕即時被老闆炒魷咩！所以話，議員確係非比尋常嘅超級打工仔，簡直當正自己係「人民老闆」，想加幾多就幾多，點樣飛擒大咬都冇有怕。

其實，市民眼睛係雪亮嘅，如果議員做好佢哋份工，表現稱職，加人工唔係無得傾。之不過咁，太一叮喺度問一句尊貴嘅議員，立法會變咗立發會，係咪就唔再係垃圾會先？「三點不露」嘅李國寶夠唔夠膽保證三點盡露？其他大懶蟲又可唔可以保證呀？

唉，講起懶蟲議員嘅差劣表現，真係罄竹難書，太一叮都叮到手軟咯。「三點不露」嘅有，四年會期「零質詢」嘅有，開會一味掟蕉爆粗鬥做騷嘅有，被指欺騙公帑嘅又有，涉嫌求愛不遂怒炒女助理嘅都有……以咁嘅表現，唔減人工都偷笑啦，仲要獅子開大口加一倍人工，如果由市民投票表決，肯定以九十九比一嘅絕大多數票否決。

咁啦，與其同局長薪酬掛鈎，不如同表現掛鈎啦。勤力開會，提高議政水平，可以加人工，但如果繼續做大懶蟲及政壇攪屎棍，就要減人工喇，咁先至係多勞多得，賞罰分明吖嘛。

一句講晒，加薪一倍太荒謬，飛擒大咬嘥公帑。立法會咪研究緊規管議員不雅行為嘅，唔該順手加多一項，研究規管議員圍威喂飛擒大咬加人工。嗱，咪話太一叮唔提醒，民意代表漠視民意，小心自作自受，被人掟蕉呀，叮！