SUN微博：打橫嚟講：低級賤招

香港呢個廢柴政府之所以不得民心，就係煲呔加林公公兩巨頭，有得威，唔叫都撲出嚟攞彩，但一有味、出事啦，就龜頭入殼，縮埋不敢見人。

嗱！當全港市民慶合合，指摘林公公無經任何諮詢的情況下，自把自為鐵定讓大陸車湧入香港「自由行」之際，曾林二龜仙人是否好應該企出來解釋一下呢？點知，僅派個低幾級嘅副局長芝麻官邱誠武頂駕，話下個月落實的首階段，淨係香港人揸車上大陸，內地人來港的第二階段，仲未落實時間表喎！

佢唔講，好哋哋，講完令人更氣憤。廟街蠱惑仔都知：「出得嚟行，遲早要還啦！」香港車行上人哋地盤，人哋咪遲早踩番落嚟！凡兩地協議，一定係公平對等的，點會有上無落，畀單邊着數晒呢？

邱芝麻官公然用甜言蜜語講幼稚話，係當香港人白癡吖？定係蓄意侮辱七百萬人的智慧呢？咁低招就想瞞天過海，好讓生米煮成熟飯時，即係氹香港揸車上咗去後，無得反口唔還，呢啲陰招，呈現了曾蔭權的縮骨思維，氹人除褲之屎橋。

本人在此踢爆佢哋啲賤招，係唔想見到有「小悅悅事件」在香港發生，更不齒這班廢柴蒙蔽中港兩地同胞。

彭志銘

次文化考古學家，對城中潮語有深入研究，博徵博引，廢官廢人行埋一邊。