政壇：陳淑莊變Lady渣渣租劏房
眾所周知，立法會議員Tanya陳淑莊曾經做過好多齣舞台劇，佢最近重操故業，模仿美國歌手Lady Gaga，披上金色假髮、戴住副星形太陽眼鏡兼着埋黑色緊身衫，變成Lady渣渣，抄考電視劇集《天與地》經典結局，狂想當年佢都有位一齊喺音樂路上嘅家明結伴添，極盡搞笑之能事，以諷刺時弊。
實情呢次Tanya係幫一個年輕人網站宣傳，先至再度粉墨登場。驟眼睇，確實認唔出化裝後嘅Tanya，但佢一開口就畀自己把鵝公喉聲出賣咗。條片講Lady渣渣因被父母送去法國讀時裝設計，所以要同家明分開，於是就幻想喺另一個平行時空中，如果佢冇去法國嘅話，可能似普通人咁買餸、睇花、冇床位生仔，仲同家明一齊去租五十呎劏房同居。話時話，如果Tanya冇做過舞台劇、冇選到立法會，唔知又會變成點呢？