政壇：港交所驚蟄加時經紀頑抗
港交所企硬喺下月五號實施第二階段港股加時，翻查月曆，赫然發現嗰日原來係「驚蟄」日！即係當日去「打小人」，會為自己轉個好運。啲中小經紀對加時極度不滿，唔知當日會唔會相約埋一齊去「打小人」，等自己順番條氣呢？
尋日就有班經紀循「正常」途徑去表達對加時嘅不滿。證券及期貨從業員工會聯同立法會議員王國興等共五名代表，約見財經事務及庫務局副局長梁鳳儀並遞交請願信，要求政府介入，取消第二階段加時，並且重新諮詢業界。佢哋今個星期四仲會約見港交所行政總裁李小加，表達訴求。
證券及期貨從業員工會會長林德明話，港交所實施首階段加時，根本無助提升國際競爭力，成交額又無增長。佢哋揚言，如果政府漠視佢哋嘅訴求，唔排除會作進一步行動，包括再次發起遊行抗議。
證券及期貨從業員工會早前遊行抗議港股加時。（資料圖片）