政壇：7．１之後 眾望所歸 林公公消失

做人最痛苦係乜？咪就係你愛嘅得唔到，唔愛嘅又甩唔到囉！夕陽政府三司十二局中，市民最唔想喺七月一日之後再見嘅，一如所料，係民望未止瀉嘅政務司司長「林公公」林瑞麟。

三十會尋日公布嘅民調結果，雖然受訪者少就少啲，得一百四十五人，但呢班市民來自不同嘅專業，超過九成人係四十五歲以下，過半數更擁有碩士或以上學歷，令呢項民調都有番咁上下參考價值。

其實有七成七受訪者都唔想教育局局長孫明揚留低，但相信市民係體恤孫公年紀老邁，健康又唔係幾好，出於惻隱之心先至唔想佢留低。不過，正值壯年、強推替補機制搞到二十二萬人上街，竟然仲挾着超低民望升官嘅林公公，有七成五反對率、一成一支持率，成為受訪者最唔想留低嘅高官。

市民想叮走蘇錦樑鬍鬚曾

除咗林公公外，終日無所事事、每月寫番篇文就有糧出嘅民政事務局局長曾德成，同埋冷手執個熱煎堆至做到局長嘅商務及經濟發展局局長蘇錦樑，仲有年年計錯、份份預算案都搞到市民天怒人怨嘅財爺鬍鬚曾，統統都係市民唔想佢哋留低嘅高官，反對佢哋留任嘅比率，至少多過支持佢哋留任嘅比率約六個百分點。

市民眼睛係雪亮嘅，例如「好打得」嘅發展局局長林鄭月娥、勞工及福利局局長張建宗同保安局局長李少光，市民都想佢哋留低。雖然有近八成受訪者想佢留低，但林鄭似乎去意已決，李少光亦將近夠鐘退休，剩低張建宗較為有可能留低，喺特區政府管治下，冇得揀嘅市民確實好痛苦。