公院亂象不止 皆因醫局縮骨

救死扶傷同草菅人命，一個行善，一個作惡，差天共地。呢，醫院本來係救死扶傷嘅地方，但如果烏龍百出，不時搞出人命，咁就同草菅人命冇乜分別喇。

邊間醫院咁得人驚？咪就係屯門醫院囉。該院喺醫管局過往兩次「手術成效監察計劃」審核都包尾，雖然最新一次審核表現略有改善，總算升到中游位置，冇咁醜怪，可惜該院近年實在發生太多醜聞，好難令人印象改觀。

唔講唔知驚，一講面都青。屯門醫院半年內已經爆出多宗嚴重事故，除咗十三歲男童入院矯正頸椎關節，手術「成功」卻性命不保呢單奇聞，烏龍傑作仲包括：三名專科醫生睇症走漏眼，心臟病老翁腦出血，仲繼續處方通血管藥，病人卒之回天乏術；早產嬰兒因打歪針被迫截肢等。

講開又講，屯門醫院嘅問題不過係冰山一角咋，其他公立醫院情況亦好唔到去邊。呢，早排九龍醫院爆出一單醜聞，患喉癌嘅七旬老翁氣管造口懷疑畀護士錯誤密封紗布後死亡，事件日前又有驚人發展，驗屍發現死者氣管同支氣管分岔位置塞有紗布，懷疑病人因此出現呼吸困難，最終窒息死亡，事後懷疑有人企圖隱瞞，毀滅證據。

夠喇！類似醜聞無日無之，再講盞口臭。究竟公立醫院問題出喺邊呢？公共醫療醫生協會負責人話，公立醫院人手不足，醫護人員工作量大，專科醫生做到氣咳，根本冇時間為新手醫生提供臨床指導。

其實，公立醫院人才流失嚴重，早就唔係乜嘢新聞，太一叮都唔知叮過醫管局高層幾多次，可惜，呢班廢柴根本唔當一回事，次次衰咗淨係識卸膊，結果問題毫無改善不特止，仲不斷惡化添。

上次屯門醫院資深醫生開錯藥累死人嗰鑊，食衞局局長周一嶽事後係都唔認衰，堅持事件同人手不足無關。好喇，今次審核，屯門醫院唔使墊底，醫管局即刻認叻話改善措施有效，但就承認並冇投入額外資源，所以醫生「忙碌咗、辛苦咗」。

叮！醫管局算死草，又想改善服務，又唔肯增撥資源，高層只掛住認叻，懶理前線醫護人員做到氣咳。咪話太一叮唔提醒，唔係次次咁好彩，如果當局再唔增撥資源，增加人手，任由公立醫院繼續超負荷運轉，遲早崩潰嘅咋，叮！