CULTURE噏：菲林機迷 逐格尋真

在這個以數碼相機拍攝、用photoshop執相的年代，仍然有一批80後堅持返璞歸真，鍾情菲林攝影，他們享受等待菲林沖曬的過程，而手捧着每格菲林片的「實在感」，亦令他們學會珍惜每下快門、每張相片。專業人像攝影師Martin Lam認為，這反映年輕人反主流而行，富尋「真」精神，對保留日漸式微的菲林攝影起了重要作用。

這次找來兩位 80後，分享他們喜愛菲林攝影的原因。

CM：我之前係用數碼相機影相，接觸Lomo機後，才發現用菲林攝影可貴之處，就係每筒菲林都有指定限額，我每按一下快門前，都要諗過度過，唔想浪費一格菲林，反而用數碼相機影相，相片數目可以話係無限，鍾意影幾多張都得，好容易「濫影」。

Jupiter：菲林唔單止保留影像，仲可以將嗰一刻光線留住，同時攝進菲林格上的光，可以「捧喺」手裏，係一種「實物」，感覺實在；而我都有影幻燈片，將幻燈片放喺燈箱上面，再用放大鏡睇，感覺特別開心。至於數碼相機影相，只係將光線數碼化，再轉化成「數據」儲存。

CM：與數碼攝影比較，菲林攝影更加「原汁原味」。依家好多人會用photoshop執數碼相，但執菲林相就要喺沖相嘅時候調校，呢個技術，依家只有好少人識，所以大多數影菲林相片嘅人都唔會執相，而我就特別鍾意菲林呢個真實一面。

Martin：愈來愈多年輕人希望擁有一啲較實在嘅嘢，如菲林底片。正如依家唔少人唔滿足於從網上下載歌曲，依然鍾情黑膠碟一樣。另外，年輕人愛反主流而行，雖然數碼相機普及，他們仍會反潮流，堅持菲林攝影。

Jupiter：菲林曬相，令人充滿期待。因為每影完一張，都要等到曬相嘅時候先可以睇到，呢個等待過程，令人非常興奮。有時候，我仲會喺屋企曬黑白相，絕不假手於人。當見到影像經過藥水顯影，慢慢化出嚟嘅一刻，就會勾起影相嗰陣時嘅回憶，呢啲係影菲林相先有嘅獨特感覺。

CM：雖然由影相到睇到張相，過程漫長，但正因為數碼相太容易得到，反而令我更珍惜每格菲林「得來不易」，而且要到曬出嚟嗰一刻，先知道張相係點，令每張相充滿神秘感。

Martin：菲林攝影受年輕人歡迎，反映佢哋愛追求真實感。此外，菲林嘅特點，亦係吸引年輕人嘅地方。影完一筒菲林後，一般都隔一段時間先沖曬出嚟，過程會勾起主人翁以往的回憶片段，令佢特別有feel。