政壇：富貴黨懸紅$5000緝貓殺手
喺上屆立法會選舉後一直飽受分裂、黨員離隊打擊嘅富貴黨，急謀喺今年九月嘅立法會選舉仗中翻身，黨嘅高層亦動作多多，尋日周末，富貴黨卻發咗份聲明，譴責日前深水埗嘅殺貓狂徒，富貴黨除公開斥責外，仲懸紅五千蚊緝拿真兇，富貴黨咁關愛動物，相信可以得到好多寵物主人嘅好感。
呢份聲明係由自由黨寵物權益關注組發出嘅，署名人雖然係關注組召集人王家祺，但以富貴黨名義發出，又公然懸紅五千蚊，聲明措詞義憤填膺，對狂徒喺唐樓天台捏花貓頸項及大力搖晃、再掟落街嘅行為大表不滿，又為小花貓嘅遭遇感到憤慨同難過。政黨發聲明關注虐貓、繼而懸紅捉兇手，富貴黨今次嘅行動點睇都唔尋常，加上佢哋過去曾經舉辦過寵物遊行，唔通動物權益將係佢哋未來嘅一個主打政策﹖