聖誕節啱啱過去，身兼「無止橋慈善基金」主席嘅殿堂級建築師吳恩融又有新搞作，佢同本港及內地嘅工程師同學生，一行五十人遠赴雲南省嘅咪霞村，親手為村民搭建堅固嘅「無止橋」，為偏遠山區送暖。
佢哋去嘅鄉村位於雲南省紅河州南面近中越邊境，當地二千個村民同埋中小學生平時就靠臨時搭建嘅簡易竹橋過河，但竹橋喺雨季時會畀湍急嘅河流沖冧，一班建築師同工程師設計咗一條長二十米、高六米嘅便橋，用上鋼製堅固嘅物料，最大嘅鋼件有成二百公斤，為居民興建一條堅固嘅橋樑。
吳恩融（左一）與咪霞村領導（左二）及義工代表主持便橋落成儀式。
