政壇：搞搞政：張建宗李國寶騎呢舞嚇人

港府高官治港無力，娛樂性卻好豐富，繼食物及衞生局局長周一嶽早前一曲走音、甩嘴嘅《忘不了你》技「驚」全港後，尋日勞工及福利局局長張建宗又搖身一變為騎呢舞王，伸手遞腳大跳騎呢版「開心舞」，或者呢班高官執包袱後可以組個娛樂班底，為佢哋帶畀港人咁多痛快贖罪噃！

尋日救世軍喺山頂舉辦「救世軍港澳定向日」，張建宗同立法會議員李國寶都係嘉賓，仲忽然無厘頭跳起舞來。張建宗嘅舞姿真係夠晒爆笑，佢嘅動作有時似荷里活影星尊特拉華達主演嘅經典電影《周末夜狂熱》，將右手食指朝天擺出招牌甫士，一時又好似齒輪生銹嘅機械人咁左扭右扭，確實令人失笑。

牡丹雖好都要綠葉扶持，企喺佢身旁嘅李國寶更係手腳有啲唔協調，唔知嘅人會唔會以為佢跳殭屍舞呢？周一鑊同張建宗歌舞咁攞命，仲擒擒青公開獻技，膽識果然驚人！