政壇：林大輝「巡倉」險變周身屎
太平紳士嘅工作之一係巡視監獄，立法會議員、「五散人」之中嘅林大輝都係太平紳士，不時要去監獄了解啲在囚人士嘅福利同訴求，佢最近去大嶼山塘福懲教所巡視時就有奇遇，林紳士就險變「周身屎」嘞！
大輝喺佢最新一期工作報告分享，前排佢同一位來自漁農自然護理署嘅官守太平紳士，一齊坐直升機去偏遠嘅大嶼山塘福懲教所巡視，兩人一落機，就發現滿地「黃金」，之唔係大嶼山嘅特產超巨大牛屎囉！點知位官員仲好唔識趣咁話，呢啲係漁護署負責嘅範疇，真係自曝其短。大輝又話，呢位官員係第一次去監獄，所以顯得好雀躍，架直升機都未停定就想上落，仲搶住坐窗口位睇風景添，唔怪得之大輝要撰文寸佢喇！
林大輝以太平紳士身份巡視監獄，幾乎變咗周身屎。