政壇：林公公民望歪論教壞學生

出任政務司司長四個多月嘅林瑞麟民望持續低企，但佢一啲都冇急起直追嘅心，尋日林公公出席基督教青年會活動時，有台下學生就佢嘅低民望開刀，質問佢點樣改善形象﹖林公公好淡定咁話，從事公眾事務永遠都會有爭議，但有爭議唔一定係壞事喎。言下之意係低民望只係爭議造成，完全冇自省表現不佳，學生哥如果學咗佢呢套厚面皮神功，就真係冇救囉！

睇番林公公嘅民望，由佢上任至今，一直係司局長中最低嗰個，有建制中人曾經話，隨着佢嘅職位唔同，負責嘅工作變化，民間評分都應該有變化，點知，幾個月過去，林公公嘅民望咁低，正所謂「爛泥扶唔上壁」。難為佢喺尋日嘅活動上，一副成功人士嘅口脗，嗌啲學生要充實自己、提升個人競爭力，仲叫學生「站得高、看得遠」喎！

手震出醜 跌區徽落地

有學生問咗個好有心嘅問題，唔明佢點解求學時期留長頭髮，依家做官就剪到咁短？林公公笑咪咪咁話，依家已經唔興長頭髮，仲趁機暗寸立法會議員長毛梁國雄留長頭髮落伍，又叫大家去見工要髮型企理，顧及儀表，唔知佢係咪想寸長毛好唔企理呢？

一向被譏「人肉錄音機」嘅林公公平時寸人冇手軟，可惜自己卻手騰腳震，活動啟動儀式舉行時，嘉賓要將手上嘅砌圖拼合成一個郵票圖案，林公公唔知點解竟然甩手，就連手上塊印有特區區徽嘅砌圖都跌咗落地，雖然佢手快快立即執番，但佢慌失失都好肉酸喇。