動用公帑燒煙花 夕陽政府佗衰家

年年難過年年過，眨吓眼除夕就快到，新嘅一年即將開始。送舊迎新，香港例牌有倒數同煙火活動，今年當然亦唔例外，不過咁，今年燒煙花居然要納稅人埋單，講起真係大煞風景。

話說年年喺中環國際金融中心舉行嘅「除夕倒數詠香江」活動，今年因為兩大固有贊助商退出，臨時臨急搵唔到其他贊助商頂替，旅發局惟有自掏腰包支付五百五十萬元經費，餘下三百萬由港府包底。

咁就奇喇，好哋哋一項旅遊盛事，過去幾年都可以順利舉行，點解今次好似倒瀉籮蟹咁狼狽呢？件事係咁嘅，自○七年起，旅發局與兩大贊助商約定連續贊助三年「除夕倒數詠香江」活動，舊年已經係額外贊助嘅第四年。當局大安旨意，以為人哋老奉會繼續贊助，點知直至十月先知道贊助商拒絕再玩，旅發局當堂被蹺起，由於一時之間搵唔到其他贊助商，而年頭又已經向世界各地做晒宣傳，洗濕咗個頭，最後咪惟有自己硬啃囉！

叮！廢柴即係廢柴，連咁簡單嘅事都搞到一鑊泡，問你服未。正如「東方報業民意調查」顯示，對於「除夕倒數詠香江」最終由港府包底三百萬元，三成三受訪者認為，公帑應用於更有意義嘅事情上；三成一指當局狼狽收場，貽笑大方；兩成八受訪者甚至認為唔應該用公帑包底添。

對於旅發局以為原有贊助商一定會續辦而無作後備安排，三成八直斥旅發局規劃與溝通亂龍，兩成九歸咎當局應變不足，兩成八則斥當局大安旨意懶懶閒。

係咯，成件事好明顯係旅發局及港府嘅責任。旅發局食嘢唔做嘢，溝通亂晒龍，結果鬧出笑話；而港府放任唔理，由得旅發局自把自為，卒之要枉花幾百萬公帑執手尾，納稅人簡直冤哉枉也。正所謂，一不離二，二不離三，當局開壞先例，以後類似例子可能陸續有來添吖！

講開又講，港府只顧花錢宣傳，但旅遊景點甩甩漏漏就關人個關，好似星光大道被美國傳媒網站評為全球十二大「最浪得虛名景點」之一，令香港丟晒架。上述民調顯示，四成三指旅遊設施管理不善影衰香港；三成一斥當局宣傳香港講一套做一套；一成八直指景點甩漏多，花錢宣傳前功盡棄。

一句講晒，今時今日咁嘅工作態度，絕對唔可以接受。剎那光輝唔代表永恒，煙花眨吓眼就燒完，但夕陽政府烏龍百出，笑話多多，呢啲污點及恥辱，睇怕永遠都洗唔甩咯，叮！