政壇：政商定格：陳大枝「生豪」跑出請食生蠔
天寒地凍，加上聖誕長假，尋日沙田馬場亦難免顯得冷清。喺場內見到保良副主席Eric鄭錦鐘夫婦，Eric兒孫滿堂，聖誕當日叫齊仔女同新抱喺屋企開BBQ派對。今日再拉隊去澳門抖抖，佢專登訂間靚房，有齊私人泳池，等孫兒盡情暢泳。
跟住撞見維昌洋行中國有限公司行政總裁陳大枝，佢嘅愛駒「生豪」出戰第三場勝出，頭馬獎金達三十八萬四千多元，呢份聖誕禮物嚟得正合時。點慶祝？佢話：「梗係食生蠔。」原來佢係生蠔迷，愛駒都改埋同一諧音，今次咁lucky，會請晒太太同囡囡擦餐勁，仲會開香檳高興吓。
