政壇：搞搞政：自備電腦打工泛民諗縮數

當初白鴿黨公開話搞特首參選人初選時，信誓旦旦咁話喺人流多嘅地方提供幾百部平板電腦畀市民投票唔會有問題。點知早前民主動力出咗個招聘廣告，列明下月八號初選嘅服務時間係朝早九點半至下晝七點半，但必須出席喺四號舉行嘅工作坊兩粒鐘，服務酬金五百蚊，但須自攜可以WiFi上網嘅手提電腦或平板電腦。

要拎自己部電腦出嚟，仲要冒住失竊同埋故障嘅危險，招聘活動反應會唔會真係咁理想，確實好令人懷疑。此外，仲有一個條件就係要有好高嘅EQ，必要時仲要好打得。試想平時投票站就話有警察維持秩序，但當日嘅票站工作人員就要一腳踢，萬一有人嚟示威同狙擊，班工作人員都要有能力應對至得。

泛民初選籌委會召集人鄭宇碩承認係資金問題，所以要求工作人員自攜電腦，又話依家大部分後生仔都有電腦，相信要招聘到足夠人手唔係問題。佢仲特別強調，工作人員部電腦如果最終失竊或畀人偷咗，籌委會一定會賠償。