政壇：唐創時避嫌試卷零接觸
既係一對仔女嘅爸爸、又係香港考試及評核局秘書長嘅唐創時，後年將面對兩難局面。佢個女依家喺傳統名校拔萃女書院讀緊中五，即係第二屆中學文憑試考生，到時佢唔單止要避嫌，缺席放榜前一日召開嘅記者會，仲唔准掂任何試卷，甚至連內部委員會會議都要避席，睇嚟佢到時應該係上任後最得閒嘅一年。
不過，唐創時坦言自己唔係一個勝任嘅家長，因為佢好少陪個女溫書應付考試，佢認為教子女學做人同為自己負責係首要任務，其次至係學問。雖然口口聲聲話好少陪個女溫書，但佢眼見個女考試在即，仍投放大量時間喺課外活動上，坦言「我都有啲驚」。佢仲記得有一次個女準備參加辯論比賽，搞到好夜至返屋企，但第二日要測驗，佢當時滿以為個女會即刻返入房溫書，點知後來發現佢仲準備緊個比賽，令佢好擔心。