政壇：內地孕婦湧港 煲呔曾後知後覺

煲呔曾治港近七年亂象頻生，懶理民間疾苦，佢日前上京述職時聽到幾句國家領導人肯定特區政府表現的話就洋洋得意，有網民事後睇唔過眼，喺特首辦社交網站連珠炮發，力數佢禍港施政證據。

出年六月三十號下台嘅煲呔曾日前最後一次上京述職，一如既往佢繼續奉行「報喜不報憂」嘅策略，一味正面解讀國家領導人對佢嘅囑咐，為自己臉上貼金，惹嚟網民強烈反響。

扭曲領導人說話內涵

有網民狠批煲呔曾淨係識自吹自擂，又話經濟增長咗幾多幾多，完全唔提香港貧窮人口增長咗幾多，通脹增加咗幾多，樓價增長咗幾多，反映佢根本就只係識「擦鞋」。

講到煲呔曾主動喺述職時提及嘅內地孕婦來港產子問題，網民更加心中有氣，批評佢假惺惺提出有關問題︰「中央有說你大開中門讓『雙非』大肚婆過來生仔係做得好嗎？真係想爆粗。」有網民則一針見血指，「雙非」問題唔係今時今日先發生，過去十年就「雙非」問題已經令好多媽媽受到不合理對待；另有網民指煲呔曾講過每日睇六份報紙，真係完全唔能夠接受佢今日先走出嚟反映意見。

話時話，煲呔曾任內已三番四次為自己施政失誤搵藉口，見親國家領導人又只係識避重就輕，成日聽啲唔聽啲，疑似扭曲佢哋講話嘅內涵，如果煲呔曾係有良知，唔該自我查找不足，特別要正視市民嘅訴求，恪盡職守做好份工，若果佢再繼續剛愎自用嘅話，只會觸發更大嘅民怨同怒潮，喺剩餘任期嘅管治亦更舉步維艱。