讀者衝破五百萬 東方太陽齊報捷

「等閒識得東風面，萬紫千紅總是春。」呢兩句詩係宋朝著名理學家朱熹嘅傑作，意思係，喺東風嘅撫摸之下，處處都係萬紫千紅嘅美景。意境無疑係好靚，但如果改幾個字，可能更加貼切：等閒識得東方面，萬紫千紅太陽升。

冇錯喇，東方紅，太陽升，前途一片光明，何止萬紫千紅吖。呢，太一叮又有好消息同大家分享，根據國際市場研究公司Oracle Added Value嘅最新報告，《東方日報》及《太陽報》銷量節節上升，兩報讀者人數衝破五百萬，齊齊創出新高，真係可喜可賀！

講起Oracle Added Value，好有來頭o架，佢係全球四大國際市場研究公司之一，客戶多數係國際知名大集團同大機構，包括滙豐銀行、可口可樂、百事可樂、Ｐ&Ｇ等等跨國企業。所以話，該公司嘅調查報告，權威性及公信性絕對毋庸置疑，珍珠都冇咁真。

事實勝於雄辯，數字說明一切。《東方日報》連續三十五年全港銷量第一，呢啲已經係眾所周知嘅事實，而更驕人嘅係王者地位穩如泰山之餘，讀者人數仲不斷刷新紀錄添。二○○八年，《東方日報》讀者超過三百零三萬，二○一○年升至三百四十四萬，今年更上一層樓突破三百七十三萬，三年之間讀者人數增加二十九萬有多，升幅近一成，都咪話唔犀利。

不過講到升幅，《太陽報》仲勁吖，銷量直逼第二位，讀者人數由三年前嘅一百零一萬，激增至今年超過一百六十三萬，升幅高達兩成六，堪稱奇迹。換句話講，《東方》《太陽》合計，讀者人數超過五百三十六萬，涵蓋全港七成半人口，係名副其實嘅香港人報紙。計太一叮話齋，東方報業有三最：最多讀者、最大市場、最具代表性。

唔怕唔識貨，最怕貨比貨，只要作一個簡單嘅比較，大家就知道太一叮絕對唔係賣花讚花香。三年前，《東方日報》讀者人數多《蘋果日報》七十二萬，今年差距已拉闊到一百三十萬，拋離成條彌敦道咁滯；《東方》《太陽》合計，讀者人數足足多爛果報逾二百九十三萬，簡直冇得揮。正所謂，得道多助，失道寡助，堅持正義嘅《東方》《太陽》銷量節節上升，而誨淫誨盜嘅爛果報就每況愈下，讀者人數比三年前少咗半成有多，咁樣跌法，容乜易陰乾呀，叮！

事實再次證明，港人眼睛係雪亮嘅，《東方日報》長期高踞全港銷量第一寶座，《太陽報》則直逼第二位，絕對唔係僥倖。就講《太陽報》，自從全面改革之後，版面年輕化，充滿時代感，深受各階層讀者歡迎，贏盡口碑。加上東方報業集團減價回饋讀者，兩報如虎添翼，氣勢如虹。

兄弟同心，其利斷金，《東方》《太陽》比翼齊飛，商機無限，五百三十幾萬讀者揀咗喇，你揀咗未吖！