政壇：四太四百萬澳門元投得白松露
澳博尋晚舉行意大利白松露慈善拍賣晚宴，透過衞星全球競投。喺拍賣前，賭王四太梁安琪捧住最大嘅一顆白松露，愛不釋手。結果佢以四百萬澳門元，投得共重一千四百九十五克嘅白松露。
一共有六組意大利白松露供嘉賓競投，當中最大嘅白松露重九百八十克，嚟自意大利托斯卡尼嘅白松露，同另一顆重五百一十五克嚟自意大利阿爾巴嘅白松露合成一組。白松露當前，四太特別興奮，舊年佢以志在必得嘅姿態，以三十三萬美元（約二百五十七萬港元）擊敗嚟自另外兩個城市以網上競投嘅競爭者，成功投得兩顆分別重九百克同四百克嘅白松露。尋晚去新葡京湊熱鬧嘅，有港澳名人、多國領事同接受捐款嘅慈善機構代表。
慈善拍賣會所得善款將捐贈澳門九間慈善機構。四太話，因為白松露嘅味道太濃烈，佢只會畀少少賭王試吓。
四太以四百萬澳門元投得共重一千四百九十五克嘅白松露。